मुगुमा सामाजिक न्याय र भ्रष्टाचारमुक्त समाज निर्माणका लागि तीन समूहबीच साझा सहमति
मुगु :मुगुमा सामाजिक न्याय, सुशासन तथा भ्रष्टाचारमुक्त समाज निर्माण गर्ने साझा उद्देश्यसहित विभिन्न अनौपचारिक संगठन तथा नागरिक समूहबीच नैतिक समन्वयता पत्रमा सहमति भएको छ। लोकतान्त्रिक मूल्य–मान्यता, मानव अधिकार, पारदर्शिता र उत्तरदायित्वलाई सुदृढ बनाउने लक्ष्यसहित मुगुका Gen Z समूह, ‘सुपो अभियान’ तथा छाउल्या सेवा समाज बीच साझा समझदारी कायम गरिएको हो।
समझदारी पत्रमा सामाजिक अन्याय, भ्रष्टाचार, शक्ति दुरुपयोग तथा दण्डहीनताले लोकतन्त्रलाई कमजोर बनाइरहेको वर्तमान अवस्थालाई गम्भीर चुनौतीका रूपमा औंल्याइएको छ। युवामा बढ्दो निराशा र राजनीतिक अस्थिरताले भविष्यप्रति चिन्ता बढाएको उल्लेख गर्दै सामाजिक रूपान्तरणका लागि साझा पहल आवश्यक रहेको धारणा व्यक्त गरिएको छ।
समझदारीअनुसार सामाजिक न्याय, समानता तथा मानव अधिकारको प्रवर्द्धन, भ्रष्टाचार र दण्डहीनताको विरोध, पारदर्शी तथा उत्तरदायी नेतृत्व विकास, नागरिक–केन्द्रित लोकतान्त्रिक सहभागिता विस्तार तथा Gen Z पुस्ताले उठाएका मुद्दालाई राष्ट्रिय बहसको केन्द्रमा ल्याउने लक्ष्य लिइएको छ।
यसैगरी, नैतिकता र इमान्दारितालाई प्रमुख मार्गदर्शक सिद्धान्तका रूपमा आत्मसात गर्दै सबै नागरिकको गरिमा, अवसर र अधिकारको सम्मान गर्ने, अहिंसात्मक तथा लोकतान्त्रिक अभ्यासलाई सुदृढ बनाउने र वर्ग, जाति, लिङ्ग, क्षेत्र तथा विचारका आधारमा हुने विभेदविरुद्ध काम गर्ने प्रतिबद्धता जनाइएको छ।
समझदारीअनुसार भ्रष्टाचारविरुद्ध जनचेतनामूलक अभियान सञ्चालन गर्ने, नागरिक शिक्षा र युवा सशक्तीकरणमा जोड दिने, अनुसन्धान तथा तथ्यमा आधारित वकालत गर्ने, संयुक्त वक्तव्य जारी गर्ने, शान्तिपूर्ण आन्दोलन गर्ने तथा सार्वजनिक निकायहरूको सामाजिक निगरानी गर्ने क्षेत्रहरूमा सहकार्य गरिनेछ।
तीनै समूहले आफूलाई गैर–राजनीतिक र स्वतन्त्र पहलका रूपमा परिभाषित गरेका छन्। कुनै राजनीतिक दल वा औपचारिक संस्था निर्माण नगर्ने, सबै पक्षको संगठनात्मक स्वतन्त्रता सुरक्षित राख्ने र सहभागिता पूर्ण रूपमा स्वेच्छिक रहने स्पष्ट गरिएको छ।समझदारी पत्रमा Gen Z समूहका तर्फबाट समाज हमाल, सुपो अभियान’का तर्फबाट सुसिल कुमार भाम तथा छाउल्या सेवा समाजका तर्फबाट बिर्खबहादुर मल्लले हस्ताक्षर गरेका छन्। उक्त समझदारी २०८२ साल पौष २२ गतेदेखि लागू हुने जनाइएको छ।
