साहित्यकार सत्य पहाडीको सत्य सञ्चयन विमोचन हुँदै
काठमाडौँ । कवि, गीतकार, निवन्धकार सत्य पहाडी लिखित दश कृतिहरुको सङ्ग्रह सत्य सञ्चयनको आज दिउँसो एक बजे नेकपा(माओवादी केन्द्र) का अध्यक्ष प्रचण्डले सांस्कृतिक प्रतिरोध दिवसको अवसरमा नेपाल प्रज्ञा प्रतिष्ठान कमलादीको डवलीमा विमोचन गर्ने भएका छन् ।
सत्य सञ्चयनमा तीन कवितासङ्ग्रह,चार संस्मरणसङ्ग्रह,एक डायरी, एक लेखसङ्ग्रह र एक जनयुद्धकालीन पत्रहरुको सङ्ग्रह गरी जम्मा दश कृति रहेका छन् । आगो, लाभा र हुरी, फर्जीका विरुद्ध र समयका यक्षप्रश्नहरु कवितासङ्ग्रह,मृत्युञ्जयी यात्रा, उत्सर्गगाथा, बेइजिङदेखि बालीसम्म, आमा एक जीवनदर्शन एक कमान्डर संस्मरणसङ्ग्रह,महात्रासदी कोभिड १९ को डायरी, जनयुद्ध, शान्ति र शिक्षाहरु ९लेखसङ्ग्रह र जनसमरका पत्र नामक कृति हालै प्रकाशित भएका हुन् ।सत्य सञ्चयनको सम्पादन कवि राजकुमार कुँवरले गरेका हुन् ।
महान् नेपाली जनयुद्धका क्रममा २०५५ साल चैत ५ गते काभ्रेको अनेकोटमा च्याङ्वा लामालगायतका पाँच जना कलाकारहरुको सामूहिक हत्यापछि अखिल नेपाल जनसांस्कृतिक महासङ्घले सांस्कृतिक प्रतिरोध दिवस मनाउँदै आइरहेको छ ।
कवि सत्य पहाडी डोल्पा जिल्लाको त्रिपुरासुन्दरी वडा नं. १० लिकुमा २०३४ साल असोज ७ गते जन्मिएकी स्रष्टा हुन् । अखिल(क्रान्तिकारी)बाट राजनीतिक जीवनको प्रारम्भ गरेकी सत्यको पहिलो रचना जीवनयात्रा २०५२ मा जनादेशमा प्रकाशित भएको थियो भने पहिलो कृति जेल जीवनमा रहँदा २०५९ सालमा पर्खालभित्रको सन्देश(संयुक्त कवितासंग्रह) प्रकाशित भएको थियो ।
साहित्यिक प्रतिभा पुरस्कार, इच्छुक प्रतिभा पुरस्कारबाट सम्मानित भइसकेकी स्रष्टा सत्य पहाडी पूर्व शान्तिमन्त्री पनि हुन् । नेकपा(माओवादी केन्द)को स्थायी समिति सदस्य समेत रहेकी स्रष्टा सत्य पहाडी अखिल नेपाल जनसांस्कृतिक महासंघ, मध्यपश्चिम साहित्य परिषद्, प्रगतिशील लेखक संघ, इच्छुक सांस्कृतिक प्रतिष्ठानजस्ता साहित्य, कला र संस्कृतिसँग सम्बन्धित संस्थाहरुको नेतृत्व पनि गरिसकेकी छन् ।
यी दश कृतिहरुको सँगालो सत्य सञ्चयनको प्रकाशन आरम्भ प्रकाशन प्रा.लि. काठमाडौँ गरेको हो ।यी दश कृतिहरुको सँगालो सत्य सञ्चयनको प्रकाशन आरम्भ प्रकाशन प्रा.लि. काठमाडौँले गरेको हो ।
