दैलेख : दुल्लु नगरपालिका–१ मण्डा टिमीलापानीमा टिप्पर दुर्घटना हुँदा एक जनाको मृत्यु भएको छ । दुर्घटनामा परि मृत्यु हुनेमा दुल्लु नगरपालिका–७ का ३३ बर्सिया गोपाल थापा रहेका छन् ।
दुल्लु–तल्लो डुंगेश्वर सडक खण्ड अन्तर्गत तल्लो डुंगेश्वरदेखि दुल्लुतर्फ आउँदै गरेको क प्र ०२००१ क १९९ नम्बरको टिप्पर सोमबार साँझ ८ बजे तिर दुर्घटना हुँदा घाइते भएका थापाको उपचारका क्रममा दुल्लु अस्पतालमा मृत्यु भएको हो ।
टिप्पर दुर्घटना हुँदा अन्य दुई जना घाइते भएका छन् । घाइते हुँनेमा दुल्लु नगरपालिका–७ बस्ने चन्द्र बहादुर थापा र प्युठानको ऐरावती गाउँपालिका–५ का ३० बर्सिया मुक्त प्रसाद उपाध्याय रहेका इलाका प्रहरी कार्यालय दुल्लुका प्रहरी निरीक्षक कृष्ण बहादुर डाँगीले बताए ।
दुर्घटनामा परि घाइते भएका दुल्लु–७ का चन्द्र बहादुर थापाको अवस्था गम्भीर रहेको जनाइएको छ । घाइते दुई जनाको दुल्लु अस्पतालमा उपचार भइरहेको प्रहरी निरीक्षक डाँगीले बताए ।
