तिला गाउँपालिकामा तेस्रो उपाध्यक्ष कप खुला भलिबल प्रतियोगिता हुने
जुम्ला : जुम्लाको तिला गाउँपालिकामा तेस्रो उपाध्यक्ष कपअन्तर्गत गाउँपालिकास्तरीय खुला भलिबल प्रतियोगिता सञ्चालन हुने भएको छ। गाउँपालिकाको आर्थिक वर्ष २०८३/०८४ को वार्षिक कार्यक्रमअन्तर्गत प्रतियोगिता आयोजना गर्न लागिएको हो।
तिला गाउँ कार्यपालिकाको कार्यालय, डुण्डेली, जुम्लाले जारी गरेको सूचनाअनुसार प्रतियोगिता २०८३ साल कात्तिक १२ गतेदेखि १४ गतेसम्म सञ्चालन हुनेछ। प्रतियोगिता तिला गाउँपालिका–स्थित सीता माध्यमिक विद्यालय, रारालिहीमा आयोजना गरिने सूचनामा उल्लेख छ।
गाउँपालिकाकी उपाध्यक्ष गोरीकला बुढाको पहलमा खेलकुद क्षेत्रको प्रवर्द्धन गर्ने उद्देश्यले प्रतियोगिता आयोजना गर्न लागिएको जनाइएको छ। प्रतियोगितामा पुरुष तथा महिला भलिबल टोलीले सहभागिता जनाउन सक्नेछन्।
प्रतियोगितामा सहभागी हुन इच्छुक टोलीले कात्तिक १२ गते बिहान ११ बजेसम्म टोली दर्ता गरिसक्नुपर्नेछ। तोकिएको समयपछि दर्ता नगरिने गाउँपालिकाले जनाएको छ।
पुरुषतर्फ प्रथम हुने टोलीले १ लाख ३५ हजार रुपैयाँ र द्वितीय हुने टोलीले १ लाख रुपैयाँ पुरस्कार प्राप्त गर्नेछन्। पुरुषतर्फ टोली दर्ता शुल्क ५ हजार रुपैयाँ तोकिएको छ।
त्यसैगरी, महिलातर्फ प्रथम हुने टोलीले ६५ हजार रुपैयाँ र द्वितीय हुने टोलीले ४० हजार रुपैयाँ पुरस्कार प्राप्त गर्नेछन्। महिला टोलीका लागि दर्ता शुल्क २ हजार ५०० रुपैयाँ निर्धारण गरिएको छ। पुरस्कार रकमबाट नियमानुसार कर कट्टी गरिने सूचनामा उल्लेख छ।
प्रतियोगितामा सहभागी हुने खेलाडीले नेपाली नागरिकताको प्रमाणपत्रको प्रतिलिपि पेस गर्नुपर्नेछ। नागरिकता नभएका खेलाडीले सम्बन्धित वडा कार्यालयको सिफारिस अनिवार्य रूपमा पेस गर्नुपर्ने गाउँपालिकाले जनाएको छ।
टोली दर्ता तथा प्रतियोगितासम्बन्धी थप जानकारीका लागि मिनबहादुर बुढालाई ९८६३३२०५३२ र धनवीर बुढालाई ९८४८३८३९५९ नम्बरमा सम्पर्क गर्न सकिनेछ।
गाउँपालिकाले खेलकुदको विकास तथा खेलाडीको प्रतिभा प्रस्फुटनमा सहयोग पुर्याउने अपेक्षासहित प्रतियोगिता आयोजना गर्न लागेको हो।
