एकता, संवाद र परिपक्व निर्णयः आजको आवश्यकता छ : नेपाली काँग्रेस जुम्ला पाटी सचिव शाही
जुम्ला : नेपाली काँग्रेस पाटी जुम्लाका पाटी सचिव लक्ष्माण बहादुर शाहीले देशको वर्तमान राजनीतिक परिस्थितिलाई हेर्दा नेपाली काँग्रेसभित्र एकता, संवाद, जिम्मेवारीबोध र परिपक्व निर्णयको आवश्यकता पहिले भन्दा अझ बढी महसुस भएको बताएका छन।उनले समाजिक संञ्जाल मार्फत आजको आवश्यकता फुट होइन, जुट हो।
मतभेद लोकतान्त्रिक अभ्यासको स्वाभाविक पक्ष हो, तर त्यही मतभेदलाई विभाजनको आधार बनाउने होइन, संगठनलाई अझ बलियो र सुदृढ बनाउने अवसरका रूपमा ग्रहण गर्नुपर्छ।
लोकतन्त्रमा विचारको विविधता स्वाभाविक हुन्छ। तर विचारको भिन्नताले संगठन कमजोर होइन, अझ परिपक्व बन्नुपर्छ। त्यसका लागि नेतृत्वदेखि कार्यकर्तासम्म सबैले संयम, संवाद र सहकार्यको संस्कृतिलाई आत्मसात् गर्न आवश्यक छ।
आज कोही अत्यधिक निराश हुने वा कोही अनावश्यक रूपमा उत्साहित हुने अवस्था सिर्जना गर्नु उपयुक्त होइन। यतिबेला विवेकपूर्ण निर्णय र साझा प्रतिबद्धताले मात्र पार्टीलाई सही दिशातर्फ अघि बढाउन सक्छ।
देश कठिन राजनीतिक मोडमा उभिएको यस घडीमा व्यक्तिगत आकांक्षा, गुटगत स्वार्थ वा क्षणिक राजनीतिक लाभभन्दा माथि उठेर राष्ट्रिय हितलाई सर्वोपरि राख्नु समयको माग हो।
लोकतान्त्रिक आन्दोलनको गौरवपूर्ण इतिहास बोकेको नेपाली काँग्रेसले जनताको भरोसा कायम राख्दै देशलाई स्थिरता, सुशासन, विकास, समृद्धि तथा राष्ट्रिय स्वाभिमानको संरक्षणतर्फ नेतृत्व दिनुपर्छ भन्ने जनअपेक्षा आज पनि उत्तिकै बलियो छ।
पार्टीसँग सम्बन्धित विषयहरूमा सर्वोच्च अदालतले आफ्नो संवैधानिक र कानुनी अधिकारअनुसार निर्णय गर्ने नै छ। न्यायपालिकाप्रति सम्मान राख्दै त्यसको प्रक्रियालाई स्वीकार गर्नु लोकतान्त्रिक संस्कार पनि हो।
तर कुनै पनि राजनीतिक दलको दीर्घकालीन शक्ति, विश्वसनीयता र भविष्य अन्ततः त्यसको आफ्नै आन्तरिक लोकतन्त्र, पारदर्शी निर्णय प्रक्रिया, आपसी संवाद, सहमति र संगठनात्मक एकतामा निर्भर रहन्छ।
यसर्थ, नेपाली काँग्रेसले आज गर्ने प्रत्येक परिपक्व निर्णय पार्टीका लागि मात्र होइन, नेपालको राजनीतिक स्थिरता, लोकतान्त्रिक भविष्य, सुशासन तथा राष्ट्रिय र अन्तर्राष्ट्रिय स्तरमा नेपालको प्रभावकारी उपस्थितिका लागि समेत महत्त्वपूर्ण हुनेछ। सुदृढ, एकताबद्ध र जिम्मेवार नेपाली काँग्रेसले मात्र जनताको विश्वासलाई थप मजबुत बनाउन सक्छ।
हामी सबैले संयम, सहकार्य, आपसी विश्वास र साझा जिम्मेवारीका साथ अघि बढ्यौँ भने कुनै पनि चुनौती असम्भव हुँदैन। संगठन बलियो भयो भने लोकतन्त्र बलियो हुन्छ, लोकतन्त्र बलियो भयो भने राष्ट्र बलियो हुन्छ। यही सत्यलाई आत्मसात् गर्दै आज एकताको सन्देशलाई व्यवहारमा उतार्ने समय आएको छ।
आज फुटको होइन, जुटको राजनीति आवश्यक छ। निराशा होइन, आशा बाँड्ने बेला हो। व्यक्तिगत स्वार्थभन्दा माथि पार्टी, पार्टीभन्दा माथि देश र जनताको हितलाई राख्दै नेपाली काँग्रेसलाई अझ सशक्त, एकताबद्ध र जनविश्वासको केन्द्र बनाउने अभियान आजको अपरिहार्य आवश्यकता बनेको छ। यही नै समयको माग, जनताको अपेक्षा र राष्ट्रप्रतिको हाम्रो साझा जिम्मेवारी हो।
