भालुको आक्रमणमा आमाछोरी घाइते, कर्णाली स्वास्थ्य विज्ञान प्रतिष्ठानमा उपचार जारी
फाइल फोटो
जुम्लाः जुम्लाको गुठी चौर गाउँपालिका–३ गज्याङकोटकी ३८ वर्षीया बमची कामी र उनकी १७ वर्षीया छोरी सिजर्ना कामी भालुको आक्रमणबाट घाइते भएका छन्।
जिल्ला प्रहरी कार्यालय जुम्लाका अनुसार, उनीहरू दुवैजना घाँस काट्न गएका बेला अचानक जंगली भालुले आक्रमण गर्दा घाइते भएका हुन्।
घटनापछि तत्काल स्थानीयको सहयोगमा दुवैजनालाई उद्धार गरी कर्णाली स्वास्थ्य विज्ञान प्रतिष्ठान, जुम्ला लगिएको छ। प्रहरीका अनुसार, आमा बमची कामीको अवस्था गम्भीर रहेको जनाइएको छ भने छोरी सिजर्ना पनि घाइते अवस्थामा छिन्।
घटनापछि भालुलाई नियन्त्रणमा लिनका लागि खोजी कार्य सुरु गरिएको जिल्ला प्रहरी कार्यालय, जुम्लाले जानकारी दिएको छ। वन कार्यालयसँग समन्वय गरेर भालुको अवस्थाबारे थप जानकारी लिने प्रयास भइरहेको प्रहरीले जनाएको छ।
स्थानीयवासीले वन क्षेत्रमा जंगली जनावरहरूको आक्रमण बढ्दै गएकाले नियमित गस्ती र जनचेतनामूलक कार्यक्रम सञ्चालन गर्न माग गरेका छन्।प्रहरी र वन विभागको टोली घटनास्थल पुगेर अनुसन्धान तथा नियन्त्रण कार्यमा खटिने भएको छ ।
