सप्तरीमा प्रहरी हिरासतमै रहेकी एक महिला बलात्कृत भएकी छन् । महिलाले आफूलाई बयानका नाममा प्रहरी अधिकृतले आफ्नो कोठामा लगेर जबर्जस्ती करणी गरेको भन्दै जिल्ला प्रहरी कार्यालय सप्तरीमा उजुरी दिएपछि घटना बाहिर आएको हो । श्रीमानलाई करेन्ट लगाएर हत्या आरोपमा उनी गत ४ चैतमा पक्राउ परेकी थिइन् । १२ वैशाखमा प्रहरीले उनलाई पेट दुखेपछि उपचारका लागि राजविराजस्थित गजेन्द्रनारायण सिंह अस्पताल लगेको र उनले अस्पतालको रेकर्डमा प्रहरीले बलात्कार गरेको उल्लेख गरेकी छन् ।
जिल्ला प्रहरीमा दिएको उजुरीमा पीडितले गत ६ चैतको राति इलाका प्रहरी कार्यालय कञ्चनपुरका प्रमुखले मादक पदार्थ सेवन गरी बलात्कार गरेको आरोप लगाएकी छन् । सोही दिन राति फेरि अर्कोपटक पनि बलात्कार गरेको र कसैलाई भनेमा २० वर्ष जेलमा कोचिदिने धम्की दिएको उजुरीमा उल्लेख छ । ‘बलात्कारपछि कसैलाई यो कुरा भनेमा २० वर्ष जेलमा सडाइदिने धम्की दिएका कारण कसैलाई भन्न सकिन’, उजुरीमा लेखिएको छ । महिलाका कानुन व्यवसायी दुर्गानन्द चौधरीले अदालतले स्वास्थ्य परीक्षण गर्न आदेश दिए पनि प्रहरीले धम्की दिएर परीक्षण गराउन भनिएको आरोप लगाए ।ADVERTISEMENT
सप्तरी प्रहरी प्रमुख एसपी नरेन्द्रकुमार कार्कीले हिरासतमा बलात्कार भएको भन्ने आरोप प्रमाणित हुने आधार नभेटिएको बताए । महिलाले आरोप लगाएको स्वीकार गर्दै उनले आन्तरिक छानबिनले त्यस्तो नेदेखिएको उल्लेख गरे । चौधरीले भने आरोपीविरुद्ध एसपी कार्कीले मुद्धा दर्ता गर्न नमिल्ने जवाफ दिएको बताए । पीडितका पतिको गत वर्ष ६ कात्तिकमा करेन्ट लागेर मृत्यु भएको थियो । जेठाजुले जीवन बीमाको रकम हात पार्न ती महिलाले भाइलाई करेन्ट लगाएर हत्या गरेको भन्दै जाहेरी दिएपछि उनी पक्राउ परेकी हुन् ।
