न्युज कारखाना
झापा, २५ भदौ
घटना- १ : झापा कमल गाउँपालिका- ७ का २३ वर्षीय दिनेश ऋषिदेवले २९ भदौ २०७७ मा ४२ वर्षीया आमा मीरा ऋषिदेवको हत्या गरे । सामान्य घरायसी विवादमै मादक पदार्थ सेवन गरेका उनले आमालाई बञ्चरो प्रहार गरी हत्या गरेका थिए । दिनेशलाई प्रहरीले तत्काल पक्राउ गर्यो ।
घटना- २ : १७ भदौ २०७७ मा शिवसताक्षी- ८ का ३२ वर्षीय मनकुमार लिम्बूले नजिकका साथी शिवसताक्षी- ११ का २९ वर्षीय गोमनसिंह मगरको धारिलो हतियार प्रयोग गरी हत्या गरे । पारिवारिक रूपमा पनि निकै नजिक रहेका लिम्बूले मगरलाई रतुवामाई वृक्षरोपण आयोजनाको जंगलमा लगेर हत्या गरेका थिए । हत्याको कारण आर्थिक लेनदेन रहेको प्रहरीले जनाएको छ ।
घटना- ३ : ४ असोज २०७७ मा कमल- २ मा ३४ वर्षीय रामजी थापाले धारिलो हतियार प्रयोग गरी २४ वर्षीया श्रीमती रीताको हत्या गरे । सामान्य घरायसी विवादमै उनले श्रीमतीको हत्या गरेका थिए । वैदेशिक रोजगारीबाट फर्किएका उनले श्रीमतीसँग बारम्बार झगडा गरिरहने प्रहरीले जनाएको छ ।
घटना- ४ : ६ भदौ २०७८ मा बिर्तामोड- ४ मा अटो चालक भात्रु राजवंशी मृत भेटिए । उनको शरीरमा चोट पटक देखिएपछि प्रहरीले हत्या अशंका गर्यो । हत्या आरोपमा उनकै भाइ ३८ वर्षीय रत्नलाल राजवंशी पक्राउ परे । सामान्य विवादमा दाजुको हत्या गरेको उनले प्रहरी समक्ष स्वीकार गरेको प्रहरीले जनाएको छ ।
०००
आफ्नाले आफ्नालाई मारेका यी त प्रतिनिधिमूलक घटना हुन् । झापामा भएका हत्याका अधिकांश घटनामा आफन्त नै संलग्न देखिएको प्रहरी तथ्यांकमा छ । प्रहरीको तथ्यांक हेर्दा अरूबाट होइन, आफन्तबाटै बच्न मुस्किल देखिन्छ । सामान्य विवाद नै हत्यासम्मको अवस्थामा पुग्ने गरेको प्रहरीको तथ्यांकले बताउँछ । नजिकका साथीबाट भएको कतिपय घटनाको कारण आर्थिक लेनदेन पनि रहेको प्रहरीले जनाएको छ ।
आर्थिक वर्ष २०७७/०७८ मा झापामा २५ जनाको हत्या भएको जिल्ला प्रहरी कार्यालय झापामा प्रवक्ता प्रहरी नायव उपरीक्षक राकेश थापाले जनाकारी दिए ।
यी हत्यामध्ये १० जनाको हत्यामा आफन्तकै संलग्नता पाइएको उनले बताए । चालू आर्थिक वर्षको साउन र भदौको २४ गतेसम्म दुई जनाको हत्या भएको प्रहरीले जनाएको छ । दुवैमा आफन्तको संलग्नता रहेको डीएसपी थापाले जानकारी दिए । प्रहरीका अनुसार आफन्तले गरेको हत्या अधिकांश योजनाबद्ध हुँदैनन् ।
आपसी विवादका क्रममा हत्यासम्मको अवस्था आउने गरेको प्रवक्ता थापाले जानकारी दिए । ‘आफन्त संलग्न भएको हत्याको घटनामा अधिकांशमा योजना बनाएर गरेको देखिँदैन । कतिपय घटना मादक पदार्थ सेवन गरेको समयमा भएको पाएका छौँ’, उनले भने, ‘घरायसी विवादका क्रममा आवेशमा आएर केहीले प्रहार गर्दा मृत्यु हुने गरेको पनि अनुसन्धानका क्रममा पाएका छौँ ।’
