जुम्लाबाट सुत्केरीको हेलिकप्टरमार्फत उद्धार
जुम्ला — तिला गाउँपालिका–३ की १८ वर्षीया अस्मिता नेपालीका लागि मातृत्वको खुसीसँगै जीवन–मरणको संघर्ष पनि जोडियो। फागुन २५ गते कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा उनले एक स्वस्थ शिशुलाई जन्म दिइन्। परिवारमा खुसी छायो, तर त्यो खुसी धेरै समय टिक्न सकेन।
सुत्केरी भएको केही दिनमै अस्मिताको स्वास्थ्य अवस्था अचानक बिग्रँदै गयो। शरीरले साथ छोड्न थालेपछि चिकित्सकहरूले उनलाई प्रतिष्ठानको आइसीयूमा राखेर उपचार सुरु गरे। तर अवस्था झन् जटिल बन्दै गएपछि चिकित्सकहरू चिन्तित भए।
अस्मिताको मृगौला र फोक्सोमा समेत समस्या देखिन थालेपछि उनलाई तत्कालै थप सुविधायुक्त अस्पतालमा लैजानुपर्ने अवस्था आयो। त्यसपछि सरकारको राष्ट्रपति महिला उत्थान कार्यक्रम अन्तर्गत नेपाली सेनाको हेलिकप्टरमार्फत उनको उद्धार गरिएको हो।
जुम्लाका प्रमुख जिल्ला अधिकारी दीपक पौडेलका अनुसार अस्मितालाई हेलिकप्टरबाट कर्णाली प्रदेश अस्पताल सुर्खेत लगिएको छ, जहाँ उनको थप उपचार भइरहेको छ।
उता, नवजात शिशुको स्वास्थ्य भने सामान्य रहेको चिकित्सकहरूले बताएका छन्। परिवारका लागि अहिले सबैभन्दा ठूलो आशा भनेको अस्मिता छिट्टै निको भएर आफ्नो शिशुलाई काखमा च्याप्ने दिनको प्रतीक्षा हो।
दुर्गम कर्णालीमा मातृत्व अझै पनि जोखिमपूर्ण यात्राजस्तै छ। अस्मिताको यो संघर्षले यहाँका महिलाले भोग्नुपरेका स्वास्थ्य चुनौतीलाई फेरि एकपटक उजागर गरेको छ।
