जुम्लामा ७० वर्षीया महिलाको रहस्यमय मृत्यु : शोकमा डुब्यो साउबाडा गाउँ
जुम्ला : कनकासुन्दरी गाउँपालिका–४ साउबाडा गाउँ यतिबेला शोकमा डुबेको छ। जीवनका सात दशक पार गरिसकेकी एक आमाको रहस्यमय मृत्युले सिङ्गो गाउँ स्तब्ध बनेको छ।
स्थानीय महेसरा सुनार (अन्दाजी ७० वर्ष) चैत ७ गते टाउकोबाट रगत बगिरहेको अवस्थामा अचेत अवस्थामा फेला परेकी थिइन्। घटनाले स्थानीय बासिन्दामा अनेकौं प्रश्न उब्जाएको छ।
उनी गम्भीर घाइते अवस्थामा भेटिएपछि तत्काल उपचारका लागि कर्णाली स्वास्थ्य विज्ञान प्रतिष्ठान शिक्षण अस्पताल पुर्याइएको थियो। तर उपचारकै क्रममा राति करिब साढे १० बजे चिकित्सकले उनलाई मृत घोषणा गरेका थिए।
जिल्ला प्रहरी कार्यालय जुम्लाका अनुसार मृतकको टाउको र आँखामा गम्भीर चोटपटक देखिएको छ। घटनाको प्रकृति हेर्दा कसैले जानीजानी आक्रमण गरेको हुन सक्ने प्रारम्भिक अनुमान गरिएको छ।
मृतकका आफन्त धीरबहादुर वडका अनुसार टाउकोमा धारिलो हतियार प्रयोग गरी प्रहार गरिएको आशंका गरिएको छ, जसले घटनालाई अझ संवेदनशील र भयावह बनाएको छ।
यो घटना चैत ७ गते दिउँसो करिब ४ बजे मात्र सार्वजनिक भएको थियो। मृतककी छोरीले आमाको फोन नउठेपछि छिमेकीलाई घरमा पठाउँदा उनी अचेत अवस्थामा फेला परेकी थिइन्। मृतक महेसरा घरकाे भाँन्सा काेठामा कमल ओडेर सुताईएकाे अवस्था थिईन । एक वृद्ध आमाको यस्तो पीडादायी अन्त्यले गाउँभरि त्रास, आक्रोश सिर्जना गरेको छ। “किन र कसरी यस्तो भयो?” भन्ने प्रश्न अहिले हरेकको मनमा उठिरहेको छ।
प्रमुख जिल्ला अधिकारी दिपक पौडेलका अनुसार घटनाको सत्यतथ्य पत्ता लगाउन प्रहरी निरीक्षक लोकेन्द्र अधिकारीको नेतृत्वमा टोली घटनास्थलमा खटाइएको छ। अनुसन्धान तीव्र रूपमा अगाडि बढाइएको र दोषीलाई कानुनी दायरामा ल्याइने प्रतिबद्धता व्यक्त गरिएको छ।
यो घटना केवल एक व्यक्तिको मृत्यु मात्र नभई समाजको सुरक्षा र मानवीय संवेदनशीलतामाथि उठेको गम्भीर प्रश्न पनि हो। एक आमाको यस्तो अन्त्यले हामी सबैलाई सोच्न बाध्य बनाएको छ।के हाम्रो समाज साँच्चिकै सुरक्षित छ? हाल साउबाडा गाउँ शोकमा डुबेको छ, जहाँ एक आमाको मृत्युले न्यायको प्रतीक्षा गरिरहेको छ।
